സ്ത്രീ- ഒരു വിദൂര ദൃശ്യം

സ്ത്രീ.
ഒറ്റനക്ഷത്രമുള്ള ഒരാകാശം കണ്ണില്‍ നിറച്ചു
എന്റെ മുന്നിലിരുന്നു.
അവളുടെ കൈപ്പിടിയിലല്ലാത്ത ഒരു നക്ഷത്രം പോലും
എനിക്കു കണ്ടെത്താനായില്ല.

അവളുടെ വിരലുകള്‍ക്കവസാനമില്ലെന്നു ഭയന്നു
ഞാന്‍ മുഖമുയര്‍ത്തി.
അവളുടെ കൂര്‍ത്ത നോട്ടമേറ്റ്‌
ഞാന്‍ പിന്നോട്ടു തെറിച്ചു വീണു.

സ്ത്രീ
ഉറക്കങ്ങളുടെയും വിശ്രമങ്ങളുടെയും അധിപ.
ഇവ രണ്ടുമില്ലാതെ താണ്ടിയ ഉയരങ്ങളിലും ആഴങ്ങളിലും
പിന്നെയും സ്വപ്നങ്ങളാണു ഞങ്ങള്‍ക്കു കണ്ടെത്താനായത്‌.
അട്ടിയും തുന്നലും ഇളകിയവ.

ശേഷം, അവളെഴുന്നേറ്റു.
അവള്‍ പൂര്‍ണ നഗ്നയായിരുന്നു.
എന്റെ ശരീരം ഹൃദയം പോലെ മിടിച്ചു.
"അടുത്തേക്കു വരണമെന്നില്ല". ഞാന്‍ പറഞ്ഞു.

ദൂരെ നിന്നു കുഞ്ഞു കുഞ്ഞു സ്വപ്നങ്ങള്‍ കൊണ്ടളന്നെടുക്കാവുന്ന
ഒരു ദ്രാവകമാണു സ്തീ.
----------------